शिराळा तालुका हा महाराष्ट्र राज्यातील सांगली जिल्ह्यामधील एक तालुका आहे. सह्याद्रीच्या डोंगररांगा आणि निसर्गरम्य वातावरणामुळे शिराळा तालुका प्रसिद्ध आहे. शिराळा तालुका भौगोलिकदृष्टया पश्चिम, दक्षिण, उत्तर, या तीन विभागात विभागाला असून दक्षिण भाग वारणा, मोरणा नद्यामुळे सुजलाम सुफलाम झाला आहे. पश्चिम आणि उत्तर भाग हा डोंगराळ असून बहुतांश लोक कामधंद्यासाठी मुंबईस आहेत.

           शिराळा तालुक्यात निनाई सह साखर कारखाना करुंगली, विश्वास सह साखर कारखाना चिखली येथे आहेत तसेच मक्यावर प्रक्रिया करून उपपदार्थ निर्मितीचा सहकार तत्वावरील आशिया खंडातील पहिला प्रकल्प यशवंत ग्लुकोज सहकारी कारखाना पाडळी येथे आहे. तालुक्यातील मुख्य व्यवसाय शेती असून भात,ऊस पिके हे प्रमुख पिक आहे, त्याच बरोबर दुग्ध पालन व्यवसाय देखील आहेत.

           शिराळा तालुक्यात स्वातंत्र्यपूर्व काळात बिळाशी येथे जंगल सत्याग्रहाची नोंद इतिहासात आहे. तालुक्यात क्रांतिसिंह नाना पाटील यांच्या प्रतिसरकारची एक शाखा कार्यरत होती. तसेच स्वातंत्र्य संग्रामातील लोकांची लपण्याची ठिकाणे पश्चिम भागात होती. त्याचप्रमाणे संपूर्ण देशभरातून भक्तजण शिराळा येथे जिवंत नागाची पूजा पहाणेसाठी नागपंचमी दिवशी उपस्थित असतात. तसेच नवनाथापैकी गोरक्षनाथ यांचे भव्य मंदिर शिराळा येथे आहे. कुंभमेळ्यानंतर १५ दिवस सर्व साधूंचे वास्तव्य दर १२ वर्षानंतर असते.